16122019Ultime notizie:

“Nos semus mandighende su sèmene de su tempus benidore” di Bartolomeo Porcheddu

Ossi, 9 gennaio 2016. Pubblichiamo un’interessante lettera sulla vicenda della ricerca mineraria nel territorio di Corte Lottene. Una riflessione in sardo molto bella nei contenuti e altrettanto piacevole da leggere. L’autore è Bartolomeo Porcheddu che ringraziamo per l’attenzione prestata al territorio di Ossi e per avere scelto il nostro giornale.

Alla Chie leat su caminu chi dae su padru andat a Costa ‘e Lòtene restat incantadu dai sa bellesa de su logu: dai un’ala s’oju imbatit dai su Golfu de s’Asinara finas a s’Alighera e dae s’àtera, manu manu chi si pigat, si podet mirare a manu manca tota sa piana de Campu ‘e Mela finas a Piaghe. A pagu tretu, sas rocas istampadas de Giorrè, chi in beranu faghent pesare bolos de puzones, sonant in ierru cando frùsciat su ‘entu, abbaidadas dae sa punta de Pintirinu chi bàrdiat totu su territòriu de Ossi. A manu dresta pighende, dai sa Punta de ‘Adde, s’iscrìrriant sos caminos e sas abbas chi giughent a Briai, a Mara, a Sìvaru, a Noale, a Sae e a Ossi.

Non pro nudda in custos logos sos ‘onnos mannos nostros b’ant fraigadu monumentos millenàrios. Su nuraghe de Costa ‘e Lòtene est unu donu chi sos architetos nuràgicos nos ant lassadu in eredidade e gai su matessi ant fatu sos mastros chi in perìodu romanu ant impedradu sa caminera chi che falat a Carzeghe. Sos nuraghes Formigiosu e Santu Maltine, umpare a sos àteros mesu disrutos, parent chi nos siant betende in cara sa neghe de non los àere contivizados. A pagu tretu dai cue, in Punta ‘e Unossi, sètzidos in s’altare sagradu nuràgicu chi finas a oe at resistidu a su tempus e a sos òmines, podimus immaginare sos cabos tribales chi si reuniant pro detzìdere su bene de sas comunidades chi rapresentaiant.

Chie resèssit a bìdere cun custos ojos cussos logos non bi ponet meda a cumprèndere chi totu su territòriu a inghìriu de Costa ‘e Lòtene intrat in cussos chi sunt sos benes istòricos e ambientales tutelados dae sa lege. Esistit in pius un’àtera forma de tutela, chi si narat paesagìstica, e chi interessat non solu sos abitantes de sas biddas interessadas ma fintzas totu sos tzitadinos chi dei cussu bene si nde gosant passèndebi. Si nois oe non semus in gradu de istimare su balore chi at custu territòriu, cheret nàrrere chi faghimus parte de una sotziedade analfabeta culturalmente, chentza memòria istòrica, chi no at sa capatzidade de istare in paghe cun su logu in ue est pesada.

Oe non podimus pius pensare de nos bèndere su territòriu a s’istracu baratu in giambu de carchi postu de tribàgliu, ca distruende su bene primàriu, chi rapresentat sa raighina de sa comunidade nostra, nos semus mandighende su sèmene de su tempus benidore. Diat èssere bene chi sos amministradores nostros de Ossi, umpare a cussos de Muros e Carzeghe, cunvocherent unu cossizu comunale pròpiu in cue, in s’altare nuràgicu de Punta ‘e Unossi, in ue in antigòria sos “bonos òmines” detzidiant su bene de sa comunidade, pro deliberare su distinu de cussu territòriu. Chissae chi sas ànimas e sos ispìritos che ancora inghìriant in cussu logu los afianzent in votatziones sàbias.     

What Next?

Articoli correlati

Leave a Reply

Submit Comment


Copy Protected by Chetan's WP-Copyprotect.